review: Dermalogica

ديرمالوجيكا ( يا طـــــــول الإسم ) لاين عناية استخدمته من كم سنه ورجعت استخدمته من فترة قريبه بعد ما كانت بشرتي مستعسره علي وكان اختيار موفق الصراحة  .. اهي الماركة مسويتها مؤسسه اسمها انترناشيونال ديرمال من اكثر من 25 سنة و تصميم العلب ظل بسيط على مر هل السنين لأن يعكس شعارهم الي اهو التركيز على النتائج مو المظاهر ..

الماركة تخرج اكثر من 75 الف استشارية في البشرة بالسنة من معاهدهم الخاصة يعني لما تروحون حق اي مركز ديرمالوجيكا راح تلقون وحدة فاااااهمة عن البرودكت وشنو استخدامها وحق اي بشره .. مو مثل الي نشوفهم بمراكز التجميل بعضهم ما يعرفون اي شي عن الماركة وتنصحك بشي ما يلائم بشرتك ..

المهم .. شريت منهم كيت البشرة الدهنية \ العادية وكان في داخلة 5 منتجات :

Special Cleansing Gel

غسول من غير صابون او عطور ملائم حتى للبشرة الحساسة فيه خلاصة لحاء الخشب واللافندر والنعناع  ------ احتاج اغسل فيه مرتين علشان احس ان بشرتي نظيفه نظيفه .

Skin Prep Scrub

 

مقشر طبيعي بخلاطة النباتات تهدي البشرة وتزيل الشوائب ----- الحلو فيه انه اتحسين بالحبيبات الي تقشر وتحسين بشرتك صج صارت انعم بعد الاستخدام .

 

Multi-Active Toner

 

رذاذ منعش يرطب وينعش البشرة ويغذيها ----- اكثر شي حبيته باللاين كله واذا برد اشتري شي منهم فهذا الشي الاكيد فيهم .

 

Active Moist

 

مرطب خالي من الزيوت بخلاصة بروتينات الحرير والخيار والمرمية ------  حليو وبس هذا الي اقدر اقول عنه يعني مو دهني وبسرعه تمتصه البشرة نفس مرطب كلينيك الاصفر بالضبط .

 

 

Climate Control Lip Treatment

 

مرطب شفافيف فيه مركبات علاجية وايضا عوامل حماية للشفاة ----- ما استخدمته عطيته ستار وستار تقول انه كان عادي ومجرد ترطيب للشفايف ..

 

يمكن تقولون اشلون اختيار موفق وبعدين بتجربتي للمنتجات ما مدحتهم وااااايد .. بس انا ترا وااااااااايد دقيقه بالاشياء الي استخدمها ومو كل شي ايوز لي .. بس بالنهاية اقدر اقول انه خلال فترة استخدامي لهذي المنتجات بشرتي تحسنت يعني هذا اللاين انصح فيه لاي بنت تبي منتجات عناية للبشرة الدهنية  تستمر عليهم ويكونون برنامج دائم او ثابت .. يعني العبرة بالنتائج صح !!! وهذا اهو شعار هذي الماركة ..