29 March 2011

Mac Wonder Woman




wonder woman collection available now on Mac counters .. Thanx  ruby_gloom for tellin the release date

26 March 2011

chocolate cupcake

اليوم كنت قاعدة اشوف سايتات طبخ وعجبتي طريقة كيكة كاكاو حق بير فوت كونتيسا وايد مادحينها فقررنا نجربها انا وديزي بس ما عندي قالبين 8 انش علشان اسويها تو لايرز فقررت اسويها بقوالب الكب كيك .. الكمية كانت وايده مع اني اتبعت المقادير عدل بس الظاهر المجريغ كب الي عندي كبير صاروا صينيتين كب كيك  .. والفروستينغ سوت لي ديزي  ألذ كريمة على تشيز وفيها فانيلا بيينزوكرمبز من الكيك نفسه .. والنتييييييييجة واااااايد حلوة .. هذا لينك للوصفة



24 March 2011

Now I know my ABCs



     next time won't you sing with me :)

Barbie hearts Melissa







باربي معروفه انها تحب الجوتي البلاستيك الوردي وعلشان جذيه ماركة ميليسا المعروفة بالجواتي البلاستيك وعندهم  لاين حق فيفيان ويستوود  صمموا كوليكشن حق باربي يشوقووون ... طالعوا رابع وخامس صورة باربي مسوية سوار تاتو الحنة احلى من الجف الي هبوا فيه بنات الكويت

19 March 2011

Déjà vu

 urban outfitters  $34
 Zara 19,500 KD

$138  J.crew

18 March 2011

Missoni Hotel




اليوم رحنا نشوف فندق ميسوني اليديد وايد عجبتنا ديكوراته واستانسنا على الالوان حيل مريحه وهادية ،، قعدنا في   choco cafe  وتعشينا اكل خفيف ساندوش مازوريلا وعصير بالورد والفستق و حلينا بلافا كيك نفس المولتن ،، وايد عجبتنا القعدة فيه هدوء وستايل القنفات حلو والستاف ومن ضمنهم ايطاليين وعرب كان وايد زين .. تعاملهم واستقبالهم  وخدمتهم ممتازين .. والقينا نظرة على المطعم الايطالي عندهم منيو ثابت ومنيو الاطباق الخاصة حق كل يوم .. شكلنا المرة الياية بنجرب نتغدى او نتعشى فيه . 

excuses


you're full of excuses,, and I love each and every one put don't let them stop you , do it now ;)

11 March 2011

Japan facing adversities


Earthquake hits, Tsunami strikes, what a tragedy.. Our thoughts and prayers are with the victims. 




اللهم إني أعوذ بك من زوال نعمتك ، وتحول عافيتك ، وفجأة نقمتك ، وجميع سخطك .. ربي لا تجعلنا ممن ينساك وقت الرخاء ولا يذكرك إلا وقت الشدّه.. اللهم أعنّي على ذكرك و شكرك و حسن عبادتك.


10 March 2011

انتي ما فيكيش دم !!

سمعت هذه العبارة وانا في رابعة متوسط من دكتور كان قاعد يعالجني .. لما قالها كان يقصد صبعي  المحترم المؤدب إلي ما رضى تنزل منه ولا قطرة دم  مع أنه مجروح .. جان يقول يا بنتي إيه داه مالوه صباعك انتي ما فيكيش دم  ؟؟  طبعاً رابعة متوسط يعني في عز سن الداعلة وهالدور يقول عني ما فيني دم  وكانت  معاي اختي الكبيرة لي الحين تعايرني بكلمة الطبيب ..

هالاسبوع حاشتني حالة انتي مفيكيش دم مرتين خلاص بتعقد رسمي .. رحت المستوصف ابي أسوي تحليل دم شامل وفيتامين دال قاعده شزيني من الصبح  التحليل على الريق وانا ما أرخص بريوقي بس ما عليه بردتي أمر ماكدونلدز اشتري لي ويبه ..

وصلت مبجر ولا ما كو إلا ثنتين في المختبر ومشغلين القرآن * العادة ألقى خمس بنات ومجابلين mbc  وحسهم واصل بره * المهم وبعد ما قريت على روحي المعوذات وكل ما أذكر من دعاء تفريج المكروب وبلشت تحوس وتفقص وترعص  بأيدي تدور على العرج ما لقت مو أول مره تحصل معاي  شوي ولا احس بشكة الأبرة بس شنو صار دمي قرر يستضرف بسلامته وخاف وما طلع وهاذي البنية الله يهداها ما عندها قشمرة تحوس بالأبرة داخل العرج ما كو فايدة وقررت تتنتقل حق أيدي الثانية الي آزرت أختها وما رضى دمي يطلع لها ولا قطرة ..

 عاد  الي خلاني أهون وأقلب عليها قلبه قشرة لما قالت إلى تسوي التحليل " ترا العيب مو من الأبرة العيب من أيديج أكو عرج بس ما يطلع دمج شسوي له " .. الله وأكبر عليكم الأبرة ما تغلط أنا إلى أيدي غلط  عاد هذا عذر ..  انا هني خلاص قلت لها وخري عني وما ابيج تجيسيني لو صاير فيني شي من حوسة هالأبر في عروقي ذيك الساعة قولي مو غلطة الأبرة ؟؟ هذا رد عاد ما عندج منطق لا تحجين أبرك لج سكرت جمومي جان تكملها علي الثانية الي توها تفرغت تشوف شنو سالفتي "روحي للسسترات ياخذون منج التحليل من كف أيدج "  حقرتها ومشيت عنها 

اليوم بعد ما طابت أدياتي وراحت عني الخرعة  من الي سووه فيني رحت لهم أسوي تحاليلي ما صارت .. دشيت عطيتهم أوراقي مسكتني وحده وبلشت تدور لها مكان تغز أبرتها وتكرر معاي نفس السيناريو ما يطلع لها شي في الغرشة تقولي شوفي ماكو شي ... عاد هاذي بدعت تسوي مساج حق ايدي والأبرة داخل وهم حولت على الأيد الثانية جان أقولها شوفي إذا ما طلع شي لا تعذبيني شيلي الأبرة على طول ترا ما فيني شده .. أشوه نجحت بالأخير وافتكيت بس بعد شنو خلوني أتوب أحلل عندهم

06 March 2011

design your shoes ..








طحت على خوووش موقع يخليك اتصممين اي جوتي تبين على ذوقك يعني اذا عندك مناسبه وفساتنك لونه صعب مو لاقيته او في موديل ابالك ودك اتسوينه .. يعني ساعات اقعد افتر السوق ابي موديل معين ولا احصل الي ابيه فهذا السايت حل المشكله وحتى مراحلة التصميم اتونس وانتي تختارين الموديل والالوان


انا مثلا ابي هل اللونين ومو محصلتهم فسويتهم اشرايكم ؟؟؟

04 March 2011

Tumblr


خلصنا من الفيس بوك والبلوق والتويتر ألحين الشي اليديد أهوه tumblr ،، شنو فيه زود أو غير ؟؟ أهوه بلوق مصغر وهذا وصف واضح وسهل حقه من  wikipedia 

•Tumblr is a blogging platform that allows users to post text, images, video, links, quotes, and audio to their tumblelog, a short-form blog. Users are able to "follow" other users and see their posts together on their dashboard. Users can "like" or "reblog" posts from other blogs on the site.



يعني 3 في 1  أهوه بلوق بس بدون التعليقات و فيه من التويتر بسالفة "follow" وفيه من الفيس بوك بحركة "like" .. يحليله حبيته وقريباً بحط على اليسار لينك حق صفحتي في tumblr. وهاذي بعض الصور الي عجبوني في صفحات الفاشن .
 



 

The Best of New York Fashion Week


who is better than ELLE to highlight the head of the class from New York’s fall 2011 season .. I like the updo soo girly and young.  credit: elle.com

ALDO Julian Louie FW 2011


Another Amazing collection for ALDO & Julian Louie for FW 2011, Lazy posted before the spring collection  Here . I don't know why ALDO branches here in Kuwait doesn't bring these shoes to us.

03 March 2011

دليلي احتار وحيرني

سالفتي اليوم لكم ما أدري ليش طرت على بالي بس يمكن من وحي اغنية أم كلثوم الي أبدع فيها عوض الدوخي هيضت هالسالفة عندي .. ورجعتني بالذكريات من وانا ياهل وقبل لا اسوق سيارة كنت كل ما ركبت السيارة عيني على الشارع والاماكن والمباني ولاني ابد ما كنت اواطن القعدة بالبيت واي احد عنده طلعة لازم انا لازقة فيه والشي الي يشجع اهلى يوديني معاهم اني كنت دليلة أدل كل مكان وحافظة الطريج .. وكانت خدماتي في الحل والترحال حتى بالسفر وبحكم اني الصغيرة كله مقعديني جدام يم سايق التاكسي وهم كنت اعرض عليه نصايحي ودنا الفندق من هذا الطريج لا تروح ذاك الطريج ..
والحمد الله على البلاغ ما صدقت متى وصلت 18 و طلعت الليسن وتخرجت واشتغلت ولكن دوام الحال من المحال والمقدر كاين عندي صديقة ذكية اكتشفت بحكم طلعاتي معاها اني ادل كل مكان فصارت حتى لما ما نكون مع بعض تدق علي تقولي بروح المكان الفلاني أو أنا بالطريج الفلاني و ترا ما أدل وانا ما أجذب خبر على طول اعطيها احداثيات الطريج وترد تدق علي لما توصل تقولي فلانة ما اصدق بسرعة وصلت نفس وصفج بالضبط وانا متشيحطة بعمري ..
والايام تركض بديت اشوف عمري من اركب السيارة اول كلمه اقوله الحين وين اروح أي طريج ؟؟ أو شلون أوصل ؟؟ وعادي بنص الطريج اكتشف اني غلطانة بالدرب .. وتشتغل الطنازة عاد من الي معاي وصرت اسمع ويي مفتر الديلكو ،، ترا درتي فينا دورة مركب ،، وين أذنك يا جحا .. انا الي قبل ينضرب فيني المثل حاشني خرف في النافيجيشن وصرت ميد ان تايون ويبيلي فورمات بعد .. يعني بالعربي بدعوا فيني بالتعليقات
المهم ولا شكيت في أمرها الا في يوم من الايام كنا مسافرين مع بعض واهلنا معانا ومره قاعدين في كافية نسولف جان يقول لنا ابو رفيجتي انتو ما تدرون انه فلانة نظّالة وعينها حارة ديرو بالكم منها وقالها بحسرة حتى أنا أبوها ما سلمت منها ناظلتني ،، الكل قامو يضحكون ويتغشمرون على السالفة الا انا وابوها خزيناها بنظرة وحده ومن ردينا وكل ما سالتني عن الطريج اتذكر حجوة أبوها واقول في قلبي الله يسامحج ويزيل شر عينك .. والله يعافي الي حط نظام النافيجيشن في السيياير فكني من المعاير من بعض الناس .
الله يرحمك يا بوفهمي


01 March 2011

March Thoughts


- الحمد لله الي يسر لنا في العطلة روحة العمرة ،، رحلة روحانية رائعة تغسل قلوبنا بالدعاء نحمد فيها ربنا الغفور ونكثر الثناء عليه جل في علاه .. يالله لك الحمد والثناء والشكر.

- شهر مارس شهر تاريخ المرأة في أمريكا وبريطانيا يحتفلون فيه من 100 سنة من عام 1911 بتكريم المرأة واستعراض انجازاتها ، والأمم المتحدة حددت يوم المرأة العالمي في 8 مارس ... يا شين الي ناوين يطلعون مظاهرات في هذا اليوم ياريت يتعلمون من المرأة الحكمة والصبر والتأني.

- تابعتو حفل الاوسكار!!؟؟ .. شصاير فيهم ما ياز لي ولا عاد الهوستس الي منقينهم قلنا منقين شباب والحين دورهم بس مو جذيه لوعوا جبدي .. احلى شي بالحفلة المجوهرات وبينولوبي كروز توها والده يا بختها ويها شويه تعبان بس هم زوغة .. وين براد بت وانجلينا جولي .. زين ايسوي فيهم كل مره يرشحونه ولا يفوز شقاصر عليه؟؟ السنه خلاهم يولون وجابل كوكش هاليهال ابرك له ..