الحمد لله الذي عافانا مما ابتلاه به الله وفضلنا على كثير من خلقه .. امس شفت موقف واااايد أثر فيني كنت في واحد من المستشفيات الخاصة وكان داخل المستشفى ستاربكس وقفت بالدور اطلب لي شي اشربه .. المهم ولا واقف جدامي شاب مبين انه كويتي وعليه لبس المستشفى الي يتربط بخيوط من ورا وتحته لابس مكسر ومغروزه بأيده الابرة مالت المغذي وماسك بوكه وقاعد يطلب قبلي من ستاربكس..
اثر فيني منظره وشلون ويه تعبان وشعره مو مرتب ولا نظيف راحت فيني الافكار وين اهله؟؟ ليش ما عنده احد يروح اييب له الاكل او القهوة لا اشتهتها نفسه ؟؟ اتهقون ينزل أهوه بنفسه ومنها يشتري الي يبي وينفه عن نفسه ويشوف الرايح والراد حسيت فيه مّل من غرفة المستشفى ويبي يشوف الاوادم كسر خاطري .. خفت اني ازعجه بنظراتي له وينحرج فحاولت اني ما اطالعه ولا يروح نظري صوبه.. وقلت في نفسي اهوه من حقه انه يتمشى واصلا المكان مستشفى وهذا مريض عسى ربي يشافيه ويذهب المرض عنه... هذا الشي خلاني انتبه على شغله ممكن تجرح بدون قصد واهي النظرة أو الظن بالناس أو مراقبتهم واهم مو محتاجين هالاهتمام الزايد منا أو الفرجه عليهم المفروض كل من ينشغل في نفسه .. يا رب تشفي كل مريض اللهم انت الشافي اللهم انت المعافي... اللهم ترزقنا صحة الأبدان والنفوس اللهم آمييين.
