26 September 2012

تجهيزات الحج Preparing for Hajj



مرحبا فيكم جميعاً  ..  تذكروني ؟؟  أنا ستاااار أكيد نسيتوني  .. بس أنا مو ناسيتكم واليوم راجعة لكم  بموضوع أن شاء الله بيعجبكم




بكتب لكم عن تجهيزاتي للحج السنة الي طافت ما شاء الله الأيام تركض والحج أهم تجربة مريت فيها وهالأيام قاعدة أتذكر شلون كنا نجهز ونستعد وتذكرت أني صورت كل شي من وناستي .. عاد حبيت أشارككم  بعض الأشياء وشنو استخدمت وشنو ما استخدمت ..
 
 
 
أكيد راح تحتاجون كتيبات عن الحج والأدعية وشرح للمناسك وحاولو تحطون لكم من الحين نوته تكتبون فيها أدعية أو تطبعون لكم أدعية من الانترنت وتلزقونهم في النوته وتصير كأنها كتيب خاص فيكم فيها كل شي تحتاجونه
 
 
 
هذولا وااااايد مفيدين من باث أند بادي وركس أنا ما استغني عن الجيل المعقم من هالمحل واستانست لما لقيت عندهم هالنوع من غير عطر علشان  لما تكونون محرمين .. بس حسافة ما أدري بسرعة يخلصون أو ما يبون منهم وايد ما أحصلهم على طول في باث أند بادي وركس
 


هذولا مناديل كبار كأنهم  فوط ومرطبة ومعقمة بماي بس ومغلفه كل وحدة بروح ينفعون أذا بتمسحون ويهكم وإيدنكم وما تبون المناديل المعطرة ... أخذتهم من دايسو وراح تشوفون أشياء وايد شاريتهم من  دايسو وترا صج ينفع دايسو حاولو تمرون عليه وأكيد راح تحصلون أشياء تستفيدون منها
 

 
المعقمات لاااااازم وضروري للنظافة العامة وأهم شي للحمامات في منى وعرفة .. أحنا خصصنا جنطة نايلون صغيرة لعدة الحمام
وماركة كلوريكس أفضل شيء ورفيقتنا على طول بس ترا هذا البخاخ كبير وسائل كأنه ماي فديروا بالكم يمكن ينكت بالجنطة أو ينبط .. أحنا نلفه بكذا جيس ونحط أحتياطاتنا  .. في منه عبوات صغيرة مرات أحصلهم ومرات لأ ويكون حجمهم أحسن من هذا 
 


هذولا الفرش وااااايد مهمين وراح تستانسون عليهم .. طريقتهم كل فرشة مغلفة بروحها ومنها وفيها المعجون يعني المعجون موجود على شعيرات الفرشة...  يا ربي على فناتق اليابانيين ... بس حطو عليها الماي وفرشوا أسنانكم  وقطوها ولا تحاتون فرشتكم تتوصخ .. بس كوالتي المعجون مو زين أو بالأحرى ماكو وايد معجون فأنتو حطو معاكم علبة معجون حق يوم عرفة و أيام منى .. أنا أحب علب المعاجين الصغيرة ملوت الاستخدام الواحد وتنقط هم أفضل لموضوع النظافة
 

 
عدة النظافة الشخصية والاستحمام من ماركة سيمبل ممتازة .. وثاني واحد على اليسار الغسول من ماركة بيجون مفيد لتعقيم الأشياء والأكل ومو مضر بالصحة لأنه بالأساس للبيبي
 

 
مروحة صغيرة  ما أذكر استخدمتها أو لأ .. بس اذا صار حر عليكم أكيد بحتاجون حق تهويه وما شاء الله نوعيتها زينة سريعة وتبرد
 

 
هذولا أخذتهم بعد من دايسو .. وراح تلاقون في دايسو أشكال وأنواع .. وبصراحة أكثر شيء استخدمته بالحج وصج راح تحتاجون لهم  ولا تفكرون تروحون الأماكن الزحمة بدونهم  خاصة لما تركبون القطار بيصير زحمة وراح تحتاجون للماسك
 
 

 
هاذي العلبة أخذتها من ايس هارد وير .. فيها أنواع مختلفة من البلاستر للجروح ومسكن للألم وماسح معقم  يعني علبة اسعافات أوليه بسيطة
 

 
هذولا من دايسو .. أكياس الثلج الجيل نجمدهم ونستخدمهم حق أذا معانا دواء نخاف عليه يخترب ويحتاج الي تبريد .. أو لتبريد بطول الماي
 

 
هذا الليت والبطاريات للأسف ما استخدمتهم .. كنت ماخذتهم حق جمع الجمرات في مزدلفة بس لأن تسكر الطريج وما قدرنا نوصل لمكان الحملة وظلينا بالباص ما نزلنا نجمع الجمرات
 

 
هذولا الجواتي الي استخدمتهم حق الطواف والسعي .. وكل واحد شاريته  من مكان مختلف .. تحتاجونهم لأنه الطواف والسعي راح ياخذون منكم مدة أطول وتحتاجون تلبسون شي مريح في ريولكم  
 
 
هذولا الأكياس من بو أمية فلس خلوها على طول معاكم في كل مكان حتى بالباص راح تحتاجون لها
 
 
 

 
أخذت معاي كل هالجناط وكلهم استخدمتهم  لوووول .. في أيام أكون بحاجة حق جنطة صغيرة شوي بس حق الكتيبات وسجادة الجيب الي تتسفط وأغراض بسيطة  ويعني ما راح أطول أخذ البنفسجية .. الفضية أخذها حق أذا بروح الحرم وما أبي شي يعيق حركتي أحطها ورا ظهري وفيها جوتيي وقشي كله .. الجنطة الحلوة الثالثة السودة هاذي من فندق الماندرين أورينتال الي سكنا فيه لما رحنا ماليزيا وايد حلوة ولونها أسود ماشية مع العباة وتتصفط وكبييييرة استخدمتها في يوم عرفة يا حليلهم لأنه الفندق يهتم بالبيئة فيقدم للضيوف أكياس خام بدل عن الأكياس الورقية وصج استفدنا من هالجناط
 
 
 
 
 هذولا الجناط حق مثلا أدوية محتاجة جنطة تبريد صغيرة أو عصاير أو سناك خفيف .. الذهبية ماخذتها من تافولا بالشويخ والثانية الي لونها أزرق ماخذتها من ايس هارد وير  .. والحلو فيها أنها تتسفط وصايرة بالطول تصلح حق بطل الماي  وكنا نستخدم قوالب الثلج الي حطيتهم فوق داخل هالجناط للتبريد


في أشياء ثاني ما صورتها وحابة أذكرها لكم:

- في أيس هارد وير .. قنينات الماي فاضيه الي يستخدمونها الرياضيين كنا نترسهم من ماي زمزم ونشرب منها طول اليوم  وطبعا بأحجام وألوان مختلفة .. وأتوقع أنها موجودة وتباع بأمكان ثانية
- في مكان معروف لتجهيزات الحج ركن الملابس بجمعية الفيحاء .. تقريبا كنت كل أسبوع أمر لهم أشوف شنو منزلين
- احسن العبايات للحج والعمرة من الشرقية الي بمكة أسمها عباية عجمان وتصير بموديل الفرشاة واسعة وخامتها تهبل وفي كذا موديل من نفس العباية
- حبوب المص ضرورية معاكم كنا على طول ناكل حبوب المص والأفضل الي تكون من أعشاب أو مستخلصة من مواد طبيعية بالزنجبيل والليمون مرات ما أحصل بالكويت أنواع ممتازة بس الموجود بالصيدلات ممكن يكون زين فما أقدر أعطي أسماء ماركات محددة


وعذروني هذا الي أذكره  حالياً ،، الي حابة تستفسر عن أمور ثانية يسعدني أشوف و أرد على أسئلتكم
 
 

10 June 2012

Artisan du Chocolat


نازل كاكاو جديد في دين اند ديلوكا من ماركة ارتيزان دو شوكولا .. الماركة معروفة والكاكاو الي نازل مشهور عندهم واهمه سووه بالأساس حق واحد من مطاعم الشيف غوردان رامزي واهوه عبارة عن كراميل سائل مملح ومغلف بكاكاو غامق وبعدين كاكاو بودر .. والحلو فيه ان علبته وشكل البوكس كأنهم ماركة شانيل وعلى أرقام  رقم 1 أهوه الأوريجنال وباقي الأرقام على نكهات مختلفة مثل على البلساميك والفلفل الأسود والزعتر والمرمية والباشن فروت والموز ..


 اخذت علبة من الأوريجنال بس للأسف ما حبيت طعمه مر وايد تحسفت لو ماخذه الي على موز يمكن احلى

وكان المفروض يحطون تذوق للنكهات علشان نجرب ونشوف شنو النكهة الي تعجبنا  :( 

03 June 2012

جميل هذا الوقت محبط


جميل هذا الوقت محبط

الشاعر: الأمير عبدالرحمن بن مساعد


ارفع حجر تلقى مغني ... اكتب شطر تصير شاعر
اكسب صحافة .. تصير سيد للثقافة
جميل هذا الوقت محبط
اكتب بما يرضي ضميرك .. تصير حاقد
اشتم بحدة .. تصير ناقد
نافق بشدة .. يصير مستقبلك واعد
جميل هذا الوقت محبط
اسرق رغيفين .. تصير المجرم السارق
اسرق ملايين .. تصير الماجد الحاذق
جميل هذا الوقت محبط
اشرب على وقت العشا .. كاسة نبيذ
واسمع لشوبان .. وارقص الفالس .. تصير متحضر
اطلق اللحية ورتل القران وصل الخمس .. تصير ارهابي
جميل هذا الوقت محبط
اجرح يهودي .. تقوم هالدنيا وتقعد
اهتك اعراض .. ثكّل يتامى .. شيل بيت وامحي مسجد ... تنوم هالدنيا وتسكت
جميل هذا الوقت محبط
عيش هالعمر الوسيع .. وبعد ماتحياه موت
عيشوا هالعمر الوسيع .. وموتوا
الوعد يوم الوعيد .. يوم تنسى الام الطفل الرضيع
عظيم ذاك الوقت .. منصف


02 June 2012

Antoinette









كافية ومحل حلويات في سنغافورة اسمه انطوانيت على أسم الملكة ماري انطوانيت المعروف عنها حبها للحلويات علشان جذي الثيم والأكلات والحلويات كلها حسب الستايل الفرنسي الكلاسيكي.. حتى حسيت من الصور كأنه مقارب وايد لستايل لادوريه 

Antoinette link here 

source of pictures here 

Air repair Kit


بما أن موسم السفر صار على الأبواب حبيت أقولكم عن مجموعة مخصوصة حق حماية البشرة أثناء السفر تستخدم من وانتو بالطيارة وخلال سفركم وحتى عقب ما ترجعون علشان تفتكون من تأثير الجت لاغ  على بشرتكم .. اصلاً الوحده بالسفر ودها ما تحاتي بشرتها وتبي تستانس بس ساعات تتسلط البشرة وتتأثر بتعب السفر أو قلة النوم أو تغير المكان والجو فعلى الأقل مع هالمجموعة تكونين مرتاحة وما تحاتين .. الي مسوية هالماركة كانت تعاني من هالمشكلة انها لما تسافر تتأثر بشرتها وتتعب وقعدت مع كيميائيين  بالمختبرات وسألتهم شلون ينقلون محاليلهم بالسفر بدون ما تتأثر وأهم شي بالنسبة لها ان تكون المستحضرات خالية من المواد الحافظة والبتروليم والزيوت المعدنية وقدرت تسوي هالمجموعة وألحين صارت تنباع في مطارات أمريكا

تقدرون تعرفون أكثر عنها من خلال سايت الماركة  هنا

31 May 2012

Hot weather Best friend



هذا الكريم صار صديق بشرتي من ابتدى الصيف والجو الحار .. يهبل من أرجع البيت اغسل ويهي وعلى طول أحطه وأحس بالبراااااد

المكون الرئيسي بهذا الكريم الروب .. وطبعا الروب غني عن التعريف بفوائده ومن الماسكات المعروفة الي تقدرون تسونها بالبيت ماسك الروب ( روب + ماي ورد + نشا ) وايد زين بالصيف تحطونه بعد القعدة  بالشمس أو الطلعات الصباحية او اذا رجعتوا من الدوام..

علشان جذيه لما لقيت هالكريم استانست على فكرته يغني عن الماسكات ولويتهم وريحة وايد حلوة واصلا ما احب ريحة الروب على ويهي فلعشان جذي لما لقيت هذا ما فيه ريحه حبيته أكثر ولما شفت نتايجه الحلوة صرت ما استغني عنه :)

NOTHING pamper my skin after a day of q8 heat sun exposure like this cooling yoghurt :)

link: here



30 May 2012

Just like Stella




كنت في مانغو ولفت انتباهي هذا النفنوف نقشته ذكرتني بنفنوف من تصميم ستيلا مكارتني ولما رجعت البيت ودخلت سايت ستيلا ولا صج نقشة نفنوف مانغو وايد مقاربة لفكرة نفنوف ستيلا شوفو صورته الي تحت


28 May 2012

مسجد الشيخ زايد



The highlight of out visit to Abu Dhabi..

ما شاء الله روعة تصميم مسجد الشيخ الزايد الله يرحمه .. من خارج المسجد الى الداخل كل التفاصيل عجيبة وجميلة