29 September 2010

جمعية الروضة التعاونية






احنا من المساهمين في جمعية الروضة التعاونية والصور الي تشوفونها فوق وطبعاً في امور ثانية ما صورتها قاعدين احنا نشوفها كل يوم، راح ابتدي بالصورة الأولى:
عند كل كاشير في جمعية الروضة موجود هذا الإعلان بأن الأكياس النايلون تكلف 25 فلس وهااااا لا تفسفونها لانها من فلوسكم .. دام انها من فلوسنا ليش قاعدين يعايرونا بسعرها .. وما عمري شفت نفس هالاعلان في اي جمعية ثانية محد تمنن على المساهمين وقال لهم ترا سعر الجيس النايلون هالكثر ... بعدين شنو يثبت لنا ان سعر الجيس 25 فلس ؟؟ بس شفنا هذا الاعلان انه احنا لازم نرشد استخدامنا للجياس .. بفهم يعني شنو المغزى تبون نييب جياسنا معانا ولا نترس الجيس بالاغراض ويصير شثقله ويمكن ينشق علشان نرشد الاستخدام؟؟؟
الصورة الثانية : عند المدخل الرئيسي للجمعية مسوين حاجز بالطابوق علشان السيايير ما يرحون الي المواقف متعدده الطوابق الي اصلا تم بنيانها علشان تسهل على الناس مسأله الحصول على موقف .. ليش هذا الحاجز كل ماله وتمدون فيه وكل ما لكم وتضيقون اللفه على السيارات .. واصلا ليش محطوط من الاساس هذا الحاجز يعني انا اذا ما لقيت موقف المفروض انه هذا الحاجز ما يكون موجود و اتجه سيده من خلال الطريق للمواقف الخلفية مو الف دورة مركب واطلع من الجمعية و ادخل من صوب المسجد من ورا ... وعلى فكرة ترا هذا الحاجز كذا مره كسروه الناس لانه لازم تدعم فيه السيايير وترجعون تصلحونه وكعقاب تزيدون في ارتفاعه وطوله ؟؟؟
الصورة الثالثة: هالارشادات وهاللوائح من ضمن الاشياء البايخة الي اتضايق منها كل ما اشوفها كأن مو كافي الحواجز الموجودة عن كل زاويه .. لييييييييش كل هالقوانين على مواقف جمعية ترا الجمعية مرفق عام ومكان للتسوق فمن المفترض انه يعامل راود هذا المكان بأسلوب افضل من جذيه ... وكنموذج للالفاظ المستخدمة في الاعلان " عدم التسابق على المواقف " اتعجّب معقولة ان مساهمين جمعية الروضة هذا يزاهم تحطون لهم قائمة تنبيهات من ضمنها هالجملة ؟؟؟
الصورة الرابعة: ليش الفتحة الي تودي للمكتبة مسكرة بحاجز ؟؟ ويا ليت يفتح اذا قربت منه السيارة كله مسكر ؟؟ وليش محطوط من الاساس ... يا اخواني هل سمعتوا بجمعية فيها حواجز في المداخل والمخارج؟؟
الصورة الخامسة : هذا مظهر للمواقف من الخلف وطبعا في اماكن ثانية من المواقف بس ما صورتها ملوثه بكلمات مكتوبه على الطوف بالصبغ الرش عااادي ليش يصبغونه مره ثانية مو مهم لانه مو في موقع بارز على ما اعتقد .. والجبرة الي فوق بالمواقف الي لونها رمادي هم شكلها غلط عاااادي مع انه هذا اهوه الطريق الوحييييييييد للمواقف المتعدده الطوابق الي في خلف الجمعية.
وفي مواضيع ثانية كذلك من حقي اني اتكلم عنها كمساهمة ولي فيها ملاحظات .. مثل الخرير الدائم في سقف الجمعية الرئيسية هذا ليش ما يتم معالجته عادي لما نمشي وندز العربانه وفجأة نلاقى جدامنا تب يجمع الماي الي يخر من السقف .. وفي ملاحظة ثانية الحين يتم اكتشاف انه في حاجة لمصعد الكتروني جديد يتركب في وسط الجمعية .. وهل تغيير زي طاقم الكاشير الي البنفسجي الفاتح " مع انه الزي السابق كان احلى بس تظل وجهة نظر " كان ضروري وعدم تغيير زي عمال توصيل الاغراض ووضعها في الاكياس الي لونه بالاساس كان اخضر ولكن صار رمادي من كثر ما اهوه قديم مو ضروري ليش التفرقة ؟؟ وغيرها من الامور الي نلاحظها اتمنى ما تكون اهداف لكسب ود المساهمين قبل الانتخابات القادمة ..
وأخيراً احب اني اوضح شغله حيييييييل مهمة.. والله العظيم اني ما اعرف مجلس الإدارة الحالي وأحلف بالله اني ما اعرف منو بيترشح او منو المرشحين لانتخابات الجمعية .. وشي ثاني عمري في حياتي ما دخلت الي مقر انتخابات جمعية تعاونية وصوتت حق اي مجلس إدارة للجمعية .. كل ما في الامر اني مساهمة لاحظت انه الجمعية في الفترة الاخيرة صارت فيها تغييرات ولكن للاسف نتائجها قاعده تضايقني كمرتاده شبه يومية للجمعية .. وترا انا اتضايق لاني احب التسوق في الجمعية واعتبر مشوار الجمعية شي اساسي عندي علشان جذيه وايد ادقق وألاحظ.

12 comments:

Tazmania said...

لول كل هذا بجمعية الروضة :) لول لا مو شي طلعت

نـ(المطيري)ـازكـ said...

صباح الخير ..

انصدمت من سالفة الجياس ..

معقولة وصلنا لي هالدرجة .. هذا ترشيد بس من نوع ثاني ..

والله ما ادري لي وين بنوصل ..

ان شاء الله يوصل كلامج للأدارة .. وانا افضل انج تكتبين كل شي بورقة وتدزينة لهم او اذا كان لهم ايميل رساله ولو اني اتوقع ماراح يوصل لهم ..

bent el deera said...

الله يعينكم

ودام انكو ملاحظين هالشي بالجمعيه العموميه ذكروه :>

وصدقوني بيدكم تغيرونهم بالانتخابات اليايه حتى لو ما تحبين هالشي بس عشان راحتكم :>

star said...

tazmania

لازم علشان الامور تصير للاحسن


:)

حياكم الله

star said...

صباح الورد يا النزاكه ذكرتيني بمسلسل ليالي الحلمية

:))

شفتي شلون ما يسوا عليهم طابعين اعلان يقول ترا الجيس سعره 25 فلس

فكرتج وايد حلوة بس تصدقين انا جم مره ادق على الإدارة محد يرد علي

:(

star said...

أهليييييين بنوته

تصدقين بجرب هالمره اني اروح الجمعية العمومية والانتخابات


مشكوووورة

:))

Anonymous said...

الإنتخابات على الأبواب صوتي حق غيرهم
بسهم ،مجلس الإداره صار له 30 سنه وما تغير
ولاعبين لعب وإحنا ساكتين

star said...

t7l6m

من صج @@ شلون جذيه مجلس الادارة بالوراثة الظاهر

ان شاء الله ما نسكت عن الخطأ

وحياك الله

النوري said...

aslan e5tarbat eljam3ya 3ogob ma banooha sarat wayed 7osa min da5l o mo emnathema i always get lost and my stuff is incomplete cause i cant find them or i passed them
it used to be a fun jam3ya and has everything


bas salfat elchyas hathy gawya !! plus are we the one who put things in the bags wella elhnood who work there!!

star said...

النوري

true waid tagerat ashya'a I guess el9aydalya got the best makeover fii el jam3yah ;P

true also about elhnood malot el chyass it's not our fault

=D

ROro Mania said...

اي شي شكو حاطين ان الجياس بـ 25 فلس اشدعوا !!!
و الله انا ما شفت الصوره حسبالي راح يبيعون الجياس :\

عاد انا واحد من مجلس الاداره يصير ريل بنت عمتي بقولها مع اني مو من اهل الروضه بس ييرانكم:p

star said...

roro mania


اي سالفت الجياس من الاساس غلط

ومشكورة لانج بتوصلين الموضوع لهم يمكن يكون في تعديلات بسببج

وحيا الله من يانا يا رورو

;)