دليلي احتار وحيرني

سالفتي اليوم لكم ما أدري ليش طرت على بالي بس يمكن من وحي اغنية أم كلثوم الي أبدع فيها عوض الدوخي هيضت هالسالفة عندي .. ورجعتني بالذكريات من وانا ياهل وقبل لا اسوق سيارة كنت كل ما ركبت السيارة عيني على الشارع والاماكن والمباني ولاني ابد ما كنت اواطن القعدة بالبيت واي احد عنده طلعة لازم انا لازقة فيه والشي الي يشجع اهلى يوديني معاهم اني كنت دليلة أدل كل مكان وحافظة الطريج .. وكانت خدماتي في الحل والترحال حتى بالسفر وبحكم اني الصغيرة كله مقعديني جدام يم سايق التاكسي وهم كنت اعرض عليه نصايحي ودنا الفندق من هذا الطريج لا تروح ذاك الطريج ..

والحمد الله على البلاغ ما صدقت متى وصلت 18 و طلعت الليسن وتخرجت واشتغلت ولكن دوام الحال من المحال والمقدر كاين عندي صديقة ذكية اكتشفت بحكم طلعاتي معاها اني ادل كل مكان فصارت حتى لما ما نكون مع بعض تدق علي تقولي بروح المكان الفلاني أو أنا بالطريج الفلاني و ترا ما أدل وانا ما أجذب خبر على طول اعطيها احداثيات الطريج وترد تدق علي لما توصل تقولي فلانة ما اصدق بسرعة وصلت نفس وصفج بالضبط وانا متشيحطة بعمري ..

والايام تركض بديت اشوف عمري من اركب السيارة اول كلمه اقوله الحين وين اروح أي طريج ؟؟ أو شلون أوصل ؟؟ وعادي بنص الطريج اكتشف اني غلطانة بالدرب .. وتشتغل الطنازة عاد من الي معاي وصرت اسمع ويي مفتر الديلكو ،، ترا درتي فينا دورة مركب ،، وين أذنك يا جحا .. انا الي قبل ينضرب فيني المثل حاشني خرف في النافيجيشن وصرت ميد ان تايون ويبيلي فورمات بعد .. يعني بالعربي بدعوا فيني بالتعليقات

المهم ولا شكيت في أمرها الا في يوم من الايام كنا مسافرين مع بعض واهلنا معانا ومره قاعدين في كافية نسولف جان يقول لنا ابو رفيجتي انتو ما تدرون انه فلانة نظّالة وعينها حارة ديرو بالكم منها وقالها بحسرة حتى أنا أبوها ما سلمت منها ناظلتني ،، الكل قامو يضحكون ويتغشمرون على السالفة الا انا وابوها خزيناها بنظرة وحده ومن ردينا وكل ما سالتني عن الطريج اتذكر حجوة أبوها واقول في قلبي الله يسامحج ويزيل شر عينك .. والله يعافي الي حط نظام النافيجيشن في السيياير فكني من المعاير من بعض الناس .

الله يرحمك يا بوفهمي