Micro-Dermabrasion Kits

اول مرة جربت نظام التقشير الكريستالي  ( غير عن العيادات لاني هم سويته في عيادات جلدية ) كان في داشينج ديفا لمن كنت اسوي بديكير عندهم وحبيت اشلون كان ملمس ريلي يكون ناااعم بعد الجلسات .. وخلال زيارتي للرياض لقيت نفس الجهاز في سيفورا وكان غالي تقريبا ب 600 ريال بس ما ترددت اني آخذه واسمه " ديرما نيو ".. يس انا جهازي ثنائي الاستخدام للوجه وللجسم في له اسفنجة صغيرة للوجه واسفنجة كبيرة لاستخدامها للجسم وبعد ايي معاه رأس اضافي اسود لصنفرة لباطن القدم  .. ومعاه الكريم الي فيه كريسالات صغيييرة تقشر طبقة الجلد وكريم علاجي بعد الجلسات يغذي ويجدد البشرة ويخفف الحساسية ..وطريقته اغسل بالاول بالغسول ماله الي لونه اخضر بعدين احط من كريم الكريستال على المنطقه الي ابي اقشرها او على الاسفنجه نفسها وبعدين اشغله راح يعطي اهتزازات وبحركة دائرية تستخدمينه وراح اتشوفين الكريستالات صارت مثل البودرة على الويه وتشوفين احمرار خفيف بالمنطقه المعالجة وبعدين استخدم الكريم المعالج .. 

بالنسبة لفوايد التقشير الكريستالي .. الاثر الفوري للتقشير بالكريستال اهو الملمس الناعم للبشرة يعني بعد الجلسه راح يفرق عليك ويهك من ناحية النعومة ويعطي احساس مخملي للبشرة ومع الاستخدام راح اتخف التبقعات بالجلد نتيجة التقشير المستمر لطبقات الجلد الميت وبالريفيو يمدحون نتايجه للتجاعيد والخطوط ويلاحظون ان بشرتهم صارت مشدوده أكثر .. والي تستخدمه لجسمها بتلاحظ تحسن ملحوظ بملمس الجلد ويوخر التبقعات والنقط الناتجة من طرق إزالة الشعر ..

وحصلت نفس الجهاز في مركز سلطان بسعر مو طبيعي ( 4 دنانير ) هم تقشير بالكريستال بس اتيي معاه اسفنجة وحدة والباقي للمساج قاطتهم ما استخدمهم بس استخدم الاسفنجه ومخليته لجسمي بس ..مع ان نوعيه الكريم زينه بس طبعا لان رخيص ما ابي اغامر فيه لويهي وللاسف كل مره اروح مركز سلطان ادورة ودي اكود منه لانه رخيص وايهبل بس للاسف الظاهر يابوه مرة وحدة وخلص ..  

وبالنهاية اذا بقارن بينه وبين التقشير بالكريستال الي بالعيادات التقشير الكريستالي المنزلي واااااااايد احسن مع ان الطريقة بالعيادات تختلف ايكون التقسير من خلال مضخة ونظام شفط بس لازم جلسااات واااااااايدة على ما بيبن الاثر الايجابي وتلاحظين التحسن وسعر الجلسه سويته بالاميات ولازم كورس على ما تبين النتيجة فما يسوى كلش هل المخاسير وفيه شي بديل ارخص ومفعوله اقوى وتستخدمينه بكل مكان تبين ...