12 October 2011

Soap &Glory fab pore hot cloth cleanser review



نازل في بوتس من ماركة soap & Glory هذا الغسول الجديد .. عباره عن غسول كريمي يحتوي على مجموعة من الزيوت مثل اللافندر والبانثنول واللوز .. الي كان عاجبني فيه أنه فكرته بالضبط مثل فكرة غسول ثاني مشهور من ماركة ليز إيرل هنا في سالفة ان ايي مع الغسول قطعة من القماش الخفيف (الململ أو الموسلين) واهي الي تنظف الويه عدل من كل شي وتساعد في تقشير خفيف للطبقة الميتة على البشرة  .. أنا حيييل عاجبني غسول ليز إيرل لأنه كل بلوقات العناية بالبشرة يمدحونه ويتكلمون عنه .. وفي سايت الماركة بست سيلر وفي التوب تن عند كل مجلات ومواقع التجميل .. علشان جذيه قلت أجرب هذا الغسول من بوتس دام أنه متوفر هني في الكويت ..

طريقته .. توزيع كمية من الغسول على ويهج وتدلكينه لمده 1-2 دقيقة وبعدين تحطين الفوطة الصغيرة في الماي الحار بس مو حار وايد للدرجة الي تتحملينها وتبدين تمسحين الغسول عن ويهج فيها وكل شوي تردين تحطين الفوطه بالماي وتردينها على ويهج .. في باليوتيوب كذا وحده حاطين شلون يستخدمون الغسول والفوطة ..

رأيي بعد التجربة .. الغسول حيل كريمي ابدا ما يرغي وافضل انظف بشي يطلع رغوة .. الفوطة عباله كل شوي احط فيها ماي واعصرها وما احب الماي الحار على الويه  يفتح المسامات .. وبعدين بعد التنظيف ضروري اغسل الفوطة بالصابون علشان تصير نظيفة حق الاستخدام الياي .. ومرات اغسل ويهي بالصابون بعد كل هاللويه لأنه الغسول ما يرغي .. وكتنظيف صج ويهي يصير ناعم وما يتحسس لا من الغسول ولا من التدليك بالفوطة .. بس صج صج عباله .. أفضل الكليرسونيك بواااااايد على هالغسول بكل شي كتنظيف للويه والسرعة  وأهم شي سهولة الاستخدام وتنظيف الجهاز ما ياخذ وقت كلش

واخر شي الفكرة مو يديده تذكرت بعد ما جربت هالغسول اني مجربة من قبل يمكن 7 سنين من ماركة كانيبو كان عندهم زيت لتنظيف الويه وتشترين معاه فوطه من عندهم لي الحين يبيعونها .. تدليك الزيت على البشرة والفوطة بالماي الدافي على الويه كانت فكرة الفوطة حلوة بس ما حبيت الزيت لنفس السبب أحب الغسول الي فيه صابون ويرغي

2 comments:

رورو الشخبوطه said...

هالماركة جربت منها ست للجسم وحبيت السنفره..

وبشرتي الدعله ماكو شي يضبط لها :(

ومرسي ع ريفيو..

star said...

الله يعينج انا جذيه وايد اجرب ويا تصيب أو تخيب

العفو

حي الله رورو

:)