03 December 2011

Chai it

 


 على طول أحب أجرب أنواع جديدة من الجاي الي في محل الشاي Tea Gschwendner وهالمرة لما رحت عطوني كتاب الشاي .. الصراحة اخترعت ما بقى نوع جاي مو موجود ما بقى نكهة مو مسوينها ما أدري ليش يسون فيني جذيه حدي تشوقت ودي أجربهم كلهم :)

أول واحد شاي الورد الصيني .. أهوه شاي أسود مو أخضر ومعاه بتلات ورد وطعمه كأنه حاطين ماي ورد مع الجاي وريحته عجيبة  والحلو فيه انه ما يصير غامج يعني لونه أحمر حلو

ثاني واحد شاي الزعفران .. مشهور عندهم وأبرز مكوناته شاي هندي مع زعفران إيراني وريحته الزعفران فيه تينن وغاااالي العلبة الكاملة بـ 77 دينار تصوروا !! و100 غرام بـ 16 دينار ويعتبر من المجموعة الفاخرة بس لاحظت أن لازم تقللون كمية الشاي لأنه بسرعة يغمج وأصلا أختي تقول لي اقتصدي بهالجاي بالذات مو تخلصينه :\


شنو نوع الجاي المفضل عندكم من هذا المحل إذا ممكن تشاركونا نحب نعرف رايكم ؟

ويي نسيت بغيت أخلص الموضوع  ^_^ وأضغط نشر كله مستعجلة

الصورة الأخيرة أهي للزعفران الكشميري .. شريناه من جنيد مكة مو نفس سيد جنيد الي من البحرين يختلف عنه ..  قال لنا موظف المحل هذا أفضل نوع من الزعفران وطلع صج زعفران ممتاز وطريقتهم الوزن بالأوقيه يعني تولتين ونص وكميته حيل راهية وما أذكر سعره بالضبط بس يسوى أنكم تجربونه  :)

شنو نوع الزعفران المفضل عندكم ومن وين إذا ممكن بعد تشاركونا نحب نعرف رايكم؟


4 comments:

نزهاويه said...

انا اشتري منهم الجاي الابيض
و الجاي الدي كاف

star said...

نزهاوية

شلون طعم الجاي الدي كاف ؟ زين ما يختلف عن العادي

Anonymous said...

Elchay el maghreby

star said...

Anon: thanx in my next visit I'll try it I like the maghreby tea :)