Are you a Highly Sensitive Person?

هل أنتي واااااااااايد حساسة ؟؟؟

هاذي صورة الدكتورة ألين آرون عندها كتاب وموقع على الانترنت أسمه الشخص شديد الحساسية Highly sensitive person تقول فيه انه الشخص الحساس وايد كأنه يلبس نظارتين !! تخليهم يقدرون يلاحظون أدق و أقل التفاصيل الي يمكن الشخص العادي ما يلاحظها مثل: نظرة، شعور، رسالة مبطنة داخل الحجي .. الخ

وتقول أنه الحساسية تكون موجوده في الأنسان من و أهوه بيبي الي يبجي وايد هذا راح يكبر ويصير حساس وايد .. وذاكره في كتبها ان وايد ناس بسرعة تتأثر مشاعرهم ونقول عنهم دلوعين أو رقيقين أو حتى ضعاف بس لازم نفهم ان هذا شي فعلي وان نتعامل معاه مو على اساس أنه عذر علشان الواحد تثور مشاعره في كل وقت وساعات بدون سبب واضح.. وطبعاً الدكتورة ألين تفسر هذا الشي بأن الشخص الحساس درجة القلق والمحاتاة عنده أكبر من الشخص العادي بسبب أي حافز خارجي أو داخلي منها على سبيل المثال << طبعاً هني راح نكتشف ونقول في قلبنا صح أنا اسوي جذي أو احس جذيه :(( خل نشوف شنو اهيه:

وايد يدققون على صغائر الأمور - يحبون يقرون ما وراء السطور وما يطوفهم شي وهذا الشي دليل على ذكائهم بس أكثر شي يتعبهم لأنهم بسرعة يكتشفون الحقيقة - اذا شافوا فلم حزين مو بس يبجون لا يتأثرون ويحسون بحزن حقيقي كأنه شي واقعي مو فلم - الأصوات العالية الازعاج الضوء العالي والزحمة وحتى المنبهات مثل الشاي والقهوة الي تسهرهم تخليهم يتأثرون أو ينفعلون بسرعة - ما يحبون الأنفتاح على الأماكن الجديدة أو الناس اليدد في حياتهم - اذا انسان مو مرتاح أو متضايق في محيطهم يحاولون كثر ما يقدرون يخلونه يرتاح علشان أهمه بعد يرتاحون وما يتوترون يعني التوتر معدي بالنسبة لهم وتأثرون فيهم - علشان يحمون انفسهم أما ينسحبون أو يهاجمون ولهم 6 طرق يدافعون فيها عن انفسهم : يصغرون الموضوع وسوالف عادي ما صار شي و كله واحد - يلقون اللوم وكله منك أو منج وانتو غصبتوني وانتو السبب - يكبرون انجازاتهم انا الي راكضت وانا كل شي سويته بروحي محد ساعدني وانا بدعت فيهم - التضخيم يعني كل شي دبل سايز - الإسقاط كل العيوب يحطونها في الشخص الي ما يحبونه والعكس صحيح - الانسحاب الهروب من المشكلة أو المنافسة بسبب خوفهم من الفشل أو لآن القلق الزايد يخرب عليهم ثقتهم بنفسهم.

طبعا تتفاقم الحالة عند الانسان الحساس اذا انجرح مرتين ومن نفس الشخص هذا عاد يطول على ما يتعالج من أثر هذه الجروح في داخل ذاته...

الرسالة الأخيرة الي تبي توصلها لنا الدكتور الين أنه لا تخشوووووون حساسيتكم لأ .. تقول عالجوها واعترفوا بوجودها التظاهر بعدم وجودها راح يزيدها .. ولازم انقلل من القلق في حياتنا ونخفف الضغط على جهازنا العصبي من خلال اليوغا والتمارين الرياضية نختار بعناية مع منو نقعد وشكثر من الوقت نقعد معاهم وعبروا عن مشاعركم بتلقائية مع ناس تحسون انهم فاهمينكم عدل أو على الآقل يقدرون يفهمونكم ..

ألحين يا دوري فيه كويز في السايت جربوه وشوفو درجاتكم وفيه بعد معلومات اضافيه انا مختصرة وايد شغلات بس حبيت افيدكم مثل ما استفدت منها والموضوع وايد عميق وحلو سواء لنا او حق الي حوالينا

سايت دكتورة ألين آرون وهني الاختبار الشخصي