ريزوتو بالمشروم

اذا تحبون الريزوتو جربوا هل الطريقه وااايد حلوة

انا اسويها بالمشروم بس تقدرون اتطبقوها بأي نوع اتحبونه
اول شي انا بوصفتي استخدمت الريزوتو من ماركس سبنسر بس ما حبيته افضل تشترونه من مركز سلطان او دين اند دلوكا

الطريقة : اول شي انييب مشروم فرش وونحمسه بربع قالب زبده مع شوية ثوم ولما يتحمر اشوي نشيله ونحطه على جنب وبنفس المقله انحط زبده تقريبا ربع قالب او أكثر شوي ونحط بصله صغيره مقطعه صغار صغار مع شويه ثوم ونحط كميه الريزوتو الي تبونها انا سويت تقريبا نص الجيس طلعت راهيه اذا انتوي شخصين سووا اقل ونحمس العيش مع البصل والزبده لين اشوي ايتغير لونه تقريبا دقيقتين وانكون امذوبين مكعب ماجي في ماي حار نحطه على الريزوتو لين يغمره ونحركه اشويه ولمن ينشف الماي هم نزيده بعد وننطر لين ينشف بعدين انحرك الريزوتو ونظيف له ماي اشوي اشوي واحنا نحرك لين بس يستوي وبس اتشوفون حبة العيش نظت انشيله وانحطه في طبق التقديم

الصوص : ناخذ مشروم فريش ونحمسه مع زبده وشوية زيت ولمن ينظى نحط عليه علبه كريمه سايله وتقريبا ملعقه كبيره ساور كريم واذا مو متوفر انحط جبن كرافت السائل ونحط اوريغانو ولمن انشوف الصلصه صارت ثقيله انصبها على الريزوتو ونبشر عليها جبن بارميزان

وصحتييييييين :)