16 January 2012

Komar Secret



مرت عليكم ماركة عناية للبشرة اسمها أسرار كومار ؟؟ أسم غريب صح !!! مدحوا لنا هذي الماركة الي توصفها احد دكتورات الجلدية لمراجعاتها وقلنا نجربها .. وهذي خلاصة تجربتنا لها ..
اللاين اسمه ( ميزو ) ومثل ما تعرفون علاج الميزو ماخذ شهرة كبيرة بكونه علاج يعيد النظارة والشباب للبشره وانواعه كثيرة بس كعلاج يتضمن الوخز بالابر التي توصل الميزو الي طبقات البشرة وطبعا مو الكل يتقبل علاج من هل النوع مؤلم وصعب على الخوافات مثلنا .. ففكرة كريمات الميزو وااايد لاقت ترحيب منا وتحمسنا لها وشريت كريم الميزو للنهار و الميزو تونر  وستار شرت الميزو لوشن الي تكون تركيبته اخف من الكريم ..


التغليف عادي ومو فخم مع ان اسعار هذي الماركة غالية والعلب من الزجاج وهذا يخليها ثقيله وعموما ما افضل العلب الزجاجية بس تغليف الكريم المدور بالذات كان يذكرني بالماركات الرخيصه الي بالجمعيات .. 


التونر ملمسه خفيف سهل الامتصاص من البشرة يحتوي زيوت اساسية والخروع والرازبيري
بس ما حبيته لان ريحته مومقبوله بالنسبة لي كانها شي محزر او قديم وهذا ما شجعني ان استخدمه
لان كل ما تذكرت ريحته اكش من اني استخدمه ما ادري اذا كان تونري انا قديم او هذي ريحتة المستحضر نفسه ما اقدر احكم ..
هذا الي مو حلو بالصيدليات ان ما في تستر .. ما استمريت عليه فما شفت منه فايدة


الكريم ملمسه حلو خفيف وبسرعه تمتصه البشرة وريحته خفيفه كمرطب احب انه خفيف ومو دهني
بس بالنسبة لنتايجة الي لاحظته بعد استخدامي لهذا المستحضر اول ما استخدمه حسيته وااااااااو وكان بشرتي تحسنت
بس مع الاستخدام لاحظت ان بشرتي تقشر بصورة يوميا كاني قاعدة استخدم الرتين اي ..
تعرفون لما تسوون تقشير شلون البشرة تصير كانها بشرة عجوز اتجعد وفيها قشور وضلين استخدمه فتره قلت يمكن هذا شي مؤقت وبيروح .. بس ظليت احس اني كل ما حطيته ان بشرتي ما فيها ماي جاااااااااافه واتقشر يوميا .. يعني وبعدين لي متى!!! ويمكن تلاحظون شكثر انا مستخدمة من العلبة .. فكانت المحصله اني وقفته ما حبيته انا ابي بشرة نظرة مو بشره جافة ومعرفطه ..



 رفيو ستارعن اللوشن  : انا قاعدة انقل لكم كلامها عنه


" كرهته إلى اقصى درجة ، وما سوى شي زين حق بشرتي وحسافة الفلوس الي قطيتها عليه "

:)

اتونس ستار صح

للاسف ما ناسبتنا هذي الماركة للعناية للبشرة يمكن لها طريقه معينه او خلطه كريمات معاها بس ستار وانا ما راح انغامر
وراكنينهم على الميز حتى اشعار آخر .. اتمنى ان الرفيو كان مفيد واذا مجربينها شاركونا برايكم فيها ..
الماركة موجودة في الصيدليات

3 comments:

Dolores said...

انا ماجربت كومار :) يمكن يناسب بشرته سلامااات

رورو الشخبوطه said...

لما قريت اسمها توقعت رخيصه..

بس شلون طريقتكم باستخدام الكريمات لانه ماشاءالله لاحظت عندكم وايد ؟؟

وانا مثل حالتكم وودي اخلصهم احس انجاز خخ..

lazy dazy said...

Dolores

ايه الظاهر خخخخ


اهلين روروة

لا والله مو رخيصه .. ابيييييه كريماتنا ×_×
ساعات اقول بس ستوب بس اذا سافرت وشفت شي قاريه عنه ما اقاوم اشتريه واخليه لين اييله الدور :)
انا اسوي تدوير على الكريمات الي عندي حسب احتياجات بشرتي