14 January 2012

Review: Sisley Skin Care



هالماركة ممتازة وصرت اثق فيها حيل ولا شي استخدمته منهم سبب حق بشرتي حساسية .. بالعكس لاحظت أنها ساعدت بشرتي وحيل تحسنت بشرتي والشي الي مستغربته أني قبل كنت ما أفكر أشتري من سيسلي ولا أمر صوب الكاونتر مالهم  كله على بالي أن منتجاتهم قديمة وداثرة .. الصراحة طلعت غلطانة لغاية ما جربتهم ولاحظت الفرق على ويهي  صارت سيسلي اختياري الأول وعلى طول ودي أجرب اشياء جديدة منهم .. والشي الي خلاني احبها أكثر أن منتجاتهم كلها بالاعشاب والزهور والزيوت والمكونات الطبيعية وحتى ريحة الكريمات على زهور وأعشاب .. خلوني أقول لكم شنو جربت ؟؟

1. ecological compound
أبي أقول لكم أول شي عن هذا المرطب الخفيف للصبح وبالليل والي المفروض يستخدم تحت المرطب الأساسي ووظيفته أنه يساعد البشرة على مضار الجو ويزيد من فعالية الكريم المرطب و أهوه بالأساس علبته كبيرة اعتقد 150مل بس لقيت منزلين عرض علبة 50 مل ومعاها هدية ماسك للويه وكريم مرطب للصبح وكريم للعيون .. لغاية اليوم ما جربت هالأشياء الإضافية الي يوا هدية بالعلبة أهم شي عندي كان المرطب استخدمه أكثر شي الصبح بعد ما أغسل ويهي أحطه بسرعة تشربه البشرة وما يترك اثر وراه وبعد أحطه قبل المكياج ممتاز خفيف ومو دسم مثل المرطب العادي

 
2. Restorative Facial Cream with Shea Butter
هذا الكريم عجيب عالج ويهي من الحساسية الي تصير فيه كذا مره وأهوه الكريم هاذي مهمته يشيل الحساسية من البشرة و يعالج الضعف فيها ويخيلها أقوى وتتحمل ما إييها .. كل مره أجرب أحط على ويهي كريم يديد ويقب ويهي ويبقع على طول استخدم هذا الكريم والنتيجة عجيبة يوخر البقع الحمرا ويهدي بشرتي .. أهوه  صج دهني وثقيل شوي لأنه المكون الأساسي له زبدة الشيا الي ترطب عدل بس شوي دسمة .. ولاحظت اذا استمريت استخدم الكريم فترة طويلة مرات تطلع لي حبوب .. بس مع ذلك أحبه لأنه قبل ويهي كان يتقشر وتطلع لي بقع حمرا بس بعد ما استخدمت هالكريم تسنع ويهي من هالناحية ..

بالنسبة لي المرطب الخفيف الأول يمكن ما أرجع اشتريه مره ثانية اذا خلص أحب أجرب غيره وبعدين أرجع له .. بس مرطب الشيا بتر راح اشتري منه اذا خلص الي عندي لأنه ضروري بالنسبة لي

هذولا حالياً أهما المنتجات المفضلة عندي من سيسلي .. يا ريت اذا عندكم منتج مفضل من سيسلي تقولون لي عنه وشرايكم فيه ؟؟


3 comments:

Dolores said...

هاي
شكرا ع البوست ..ثقيل ع البشره تقصدين مثل لما واحد يحط سن بلوك ومايناسبه ويسبب احساس بالحراره ع الويه ويقمت البشره مع المشي والحركه

Dolores said...

وسوال ثاني بليز انا بشرتي حساسه ومتعبتني المسامز تنصحيني شنو استخدم ؟ لو عندج تجربه وخبره مع المسام ..ومشكوره

star said...

Hello dear :)

العفو حياج الله

لااا كلش مو نفس السن بلوك فهمت قصدج .. انا اقصد أن ثقيل أنه ما تشربه البشرة بسرعة وقوامه كريمي مو خفيف علشان جذيه مرات تطلع لي حبوب
وعلشان جذيه خبيرة الماركة قالت لي ecological compound اخف منه ويصير استخدمه كمرطب بروحه اذا مو حابه بشرتي تصير فيها لمعة دهن خاصة الصبح
وبالنسبة حق المسامات ديزي ناويه تكتب عنه هالموضوع نطريها :)