Hydration

كنت مقررة أنا ديزي نسوي بوست مشترك عن ترطيب البشرة و أنطر وأنطر بس كالعادة ديزي .. ليزي .. ويومها عن سنة فقررت أني أبلش وأكتب يمكن هالشي يشجعها وتكمل معاي الموضوع :)

مشاكل البشرة متشعبة و وايد مرتبطة بأشياء أحنا نسويها وتأثر على بشرتنا .. يعني البشرة مرات تصير دهنية بسبب الجفاف ؟؟ لأنه الدهون تنفرز بشكل أسرع وتسد مسامات البشرة و ممكن بسبب قلة النوم والتوتر وكثرة الكافييييييين والأكل الغير صحي وغيرها .. علشان جذيه  نستخدم كريمات ترطيب تعالج لنا هالمشاكل .. هالمرة بكتب عن كريمات الترطيب الي مكتوب عليها water أو aqua  لأنها تعالج الجفاف ..

استخدمت من فترة كريم لترطيب العيون من ماركة eucerin في نسبة ماي وأسم اللاين aquaporin وحبيت نتيجته صج نفع معاي .. وهالشي خلاني أجرب الكريم المرطب للبشرة من نفس اللاين واستخدمته من شهر رمضان ومستمرة عليه كمرطب خفيف وايد زين مو ثقيل ولا دهني ولا تحسست منه بشرتي نهائياً .. أنا خذيت النوع اللايت للبشرة المختلطة وهاذي صورته

هالشي خلاني أهتم بموضوع المرطب الي فيه ماي لأني أعترف أني ما أشرب ماي وايد يعني كأني أحاول أعوض الاهمال بهالناحية وصرت أدور على أفضل الكريمات الي فيها نسبة ماي .. وطبعاً ماركات التجميل ما خلوا شي و ما قصروا حتى في هالناحية ولقيت لما كنا بماليزيا من ماركة عجيييييييبة  اسمها Laneige  ماركة كورية معروفة ومشهورة عندهم سيروم اسمه water bank أهوه مستحضر علاجي للبشرة يمدها بالماي و يغذيها من الداخل  وفاز بجوائز وبست سيلر عندهم وأصلا لما حطيته على أيدي بجرب ملسمه طلع يهبل بس للأسف طلع خااااااااااالص من كل الأفرع وراح يوصلهم آخر الشهر ..  لأنه في هالمواقف نفسيتي تتأزم ما شريت لا الكريم ولا جيل العيون من نفس اللاين يا أهوه معاهم ولا ما أشتري ولا شي .. علي سوالف غريبة الحين متحسفة ما عاندت الا نفسي ؟؟ هاذي صورة السيروم المفقود من كافة فروع لينيج ماليزيا :(

والسبب الثاني الي خلاني ما أخذهم أن كان عندي باك أب كنت شاريه من الصيدلية من ماركة نايتروجينا نفس الشي لاين ترطيب يعوض الماي اسمه hydroboost وأهوه نازل لاين كامل أنا خذيت الغسول + التونر + المرطب

الغسول عبارة عن فوم وايد خفيف وفرش أغسل فيه الصبح كلش ما يعتبر منظف عميق .. التونر ما حبيت ريحته كأنه ماي فيه كلور "ماي حمام السباحة بمعنى أصح " حتى واصفينه كأنه شاور للبشرة " دارين عن ريحته".. الكريم يعتبر أحسن واحد في المجموعة ملمسه جيل على ماي على طول تشربه البشرة وتقدرون تستخدمونه كبرايمر للبشرة قبل المكياج أهو المفروض نفس طريقة كريم لينيج ترطيب مستمر كأنه الري بالتنقيط للبشرة لمدة 12 ساعة لأنه في هايلوريك أسيد وفيه زيت زيتون وجليسرين .. بس الصراحة مو مستمرة عليه عدل مرات قليله استخدمه وما أدري هذا شي غلط  أو صح لازم أستمر عليه علشان أشوف نتيجته عدل واقدر أحكم عليه بس لأني شاريه بعد أشياء ثانية من ماليزيا وحبيتهم أكثر فهذا مخليته على صوب :\

جذيه انا خلصت .. نطروا عاد ديزي تكمل باجي الموضوع  ;)