هل مرة حصل ان استخدمتي مستحضرات جديدة للعناية بالبشرة وكانت النتيجة ان طلعت حبوب في بشرتك ؟؟ وفي هذي الحالة شنو اتسوين هل ترمين هذا المستحضر والا تستمرين في استخدامه على أمل ان الوضع راح يتحسن ؟؟
ردة فعل البشرة بعد استخدام مستحضرات عناية يديدة تحكمها نظريتين .. النظرية الاولي : ان الحبوب الي تطلع بعد الاستخدام دليل على فعالية هذا المنتج وانه اهو قاعد يساعد البشرة من الداخل على التخلص من السموم داخل المسامات الي تطلع على شكل بثور وبعدها راح تحصلين على بشرة رائعه وأحسن من قبل ..
النظرية الثانية : هذا المنتج سبب هذي البثور لانه ما يناسب نوع بشرتك وفيه مواد تسبب الحساسية وهذي البثور دليل على رد فعل دفاعي من البشرة تجاه هذي المستحضرات والاستمرار في استخدامها راح يضر بشرتك وتصير اسوء من قبل ..
اي واحد من هذي الأراء اهو الصح ؟؟
بالنسبة لتجربتي .. انا اعطي المنتج اليديد الي سببلي الحبوب فترة من 3 ايام الا اسبوع اذا استمر الوضع سئ اقطع استخدامه فورا .. لاني ما ابيه يخرب بشرتي .. وطبعا اذا كان هذا المنتج غالي (TT.TT) قلبي يعورني عليه .. واحاول ارجع استخدمة بعد فتره عقب ما يكون وضع بشرتي مستقر واذا سبب لي مره ثانية حبوب فاوقف استخدامه نهائيا .. وعليه العوض ..
بس لازم تلاحظون بين الحبوب الي تكون نتيجة حساسية واهي تكون مصحوبة مع احمرار وشوية حكة وبين الحبوب الي تكون ناتجة من مكونات غير مناسبة لنوع بشرتك الي غالبا ما تكون ذات رؤوس بيضا وما يصاحبها احمرار .. الاولى وغالبا ما تصير معاي اما من استخدام مستحضرات تبييض او مستحضرات فيها مادة الريتينول المقشرة وهذي حلها اني استخدم معاها كريم فيه نسبة كورتيزون بسيطه لغاية ما اتعود عليها بشرتي لانها بالفترة الاولي تبدي اتقشر البشرة وتزيد نسبة تجددها وهذا شي مؤقت وبعد اسبوع او اكثر تنتهي ردة الفعل هذي ..
هل عانيتم من مشكلة الحبوب بعد استخدام مستحضرات جديدة ؟؟؟ هل ترمين هذا المستحضر ؟؟ او تستمرين بإستخدامه على أمل ان هذا الوضع طبيعي وسوف ينتج عنه بشرة رائعه بعد ذلك ؟؟؟ شاركونا بخبراتكم ..
2 comments:
أنا بصراحة خوافة
و ما أستخدم أي منتج إلا بعد بحث و قراءة عن طريق الإنترنت
و أول شي أجرب المنتج على منطقة صغيرة, إذا ما كان في أي رياكشن سلبي, استمريت في الاستعمال. أما لو لاحظت أي أثر جانبي, طبعا راح أتوقف عن استعمال المنتج. و ما أحب أكود منتجات ما منها فايدة, بس تاخذ حيز و تجمع غبار عالفاضي.
و بالنهاية, ما تسوى علي أخرب بشرتي ... أصلا اللي فيها مكفيها لووول
اهنيك على طريقتك .. اهي الاسلوب المثالي في التعامل مع بشرتك وبالعكس احس بشرتك واااايد زينه لانك انسانه حريصه في التعامل معها ..
انا اقرا عن منتجات واحب اجربها بس يخيب املي بعد الاستخدام لاني اتحمس والوص ويهي فيها وساعات ما تطلع لي حبوب بس هم مافي منها نتيجه
وشاكرة لك ردك الحلو ..
Post a Comment