مجموعة انجيلا

اليوم بتكلم عن تجربتي مع مجموعة انجيلا .. هالماركة معروفة عند أطباء الجلدية ويوصفونها علاج لتوحيد لون البشرة والآثار السابقة وعبارة عن نظام متكامل من 5 كريمات + تونر + غسول .. وطريقتها تسوي تقشير لطبقات السطحية للجلد علشان تتجدد وتطلع الطبقة الصافية أو الي لونها موحد .. ولانهم وايد كريمات ينحطون فوق بعض ولازم خطوات فحطيت الستكرز البرتقالي بالارقام على العلب علشان ما انسى وتقريباً صاروا 9 خطوات ورا بعض مرتين الصبح وباليل  .. والغريب ان الدكتور وصف لي معاهم كريم صغير ينباع في محلات الفلبينيات والآسيويين والغريب أكثر أني لقيته موجود في صيدلية الروضة يا ربي ما شاء الله عليهم كل شي يبيعون ؟؟ سألت الصيدلاني عن الكريم اذا فيه كروتيزون أو لا قالي لا ما منه ضرر بس أنا ما حبيته يمكن استخدمته مره او مرتين لاني ما اثق في سوالف الخلطات ..

المهم مع استخدامي لمجموعة انجيلا لاحظت بأول الايام انه بشرتي صارت تتقشر منها الطبقة الميتة من الجلد .. وصارت جافه حيل وبعد فترة صارت ما تتقشر بس ظل الجفاف وما اقدر اقعد ولا ثانية بعد ما أغسل بشرتي بدون كريم مرطب الي أهوه من نفس مجموعة انجيلا .. وبعد لاحظت ان الكريمات لما احطها على بشرتي تحرقيني حيل وبعدين يخف العوار  .. وبعدين ابتدى مسلسل الرعب معاي .. شصار في ويهي  قام ينبط الجلد أو ينشق وينزل من ويهي دم ؟؟ فجأة جذي وبدون ما أحس فيه اصلا ولا أدري عنه اخترعت واخترعوا اهلي صاروا يقولون لي شفيج ليش ويهج ينزل منه دم جذيه ؟؟  ولما راجعت الدكتور اهوه بعد اخترع وفحص ويهي قال  صار في بشرتج  مرض الوردية الجلدي أو rosacea .. وغير لي النظام كله وعطاني علاج حق بشرتي + حبوب مضاد حيوي الي في الصور الي تحت علشان يعالج آثار الي صار معاي .. وكتب لي قائمة اشياء لازم ابتعد عنها والأشياء الي تأثر علي .. ولي الحين مو كل شي يناسب ويهي وبسرعة تتحسس بشرتي وبسبب الوردية تأذيت من وايد اشياء  حتى العطور والبخور اتحسس منها وحتى اذا كنت في مكان في ليتات نيون لازم ارجع واحط كمية من كريم علاج الوردية  واشياء سخيفة أو غريبة ما كنت افكر فيها من قبل لازم ابتعد عنها أو اتحشاها .. غريبة شلون نستخدم شي على البشرة أو الويه ويكون له انعكاس أو تأثير كبير لهاذي الدرجة