16 June 2011

مجموعة انجيلا



اليوم بتكلم عن تجربتي مع مجموعة انجيلا .. هالماركة معروفة عند أطباء الجلدية ويوصفونها علاج لتوحيد لون البشرة والآثار السابقة وعبارة عن نظام متكامل من 5 كريمات + تونر + غسول .. وطريقتها تسوي تقشير لطبقات السطحية للجلد علشان تتجدد وتطلع الطبقة الصافية أو الي لونها موحد .. ولانهم وايد كريمات ينحطون فوق بعض ولازم خطوات فحطيت الستكرز البرتقالي بالارقام على العلب علشان ما انسى وتقريباً صاروا 9 خطوات ورا بعض مرتين الصبح وباليل  .. والغريب ان الدكتور وصف لي معاهم كريم صغير ينباع في محلات الفلبينيات والآسيويين والغريب أكثر أني لقيته موجود في صيدلية الروضة يا ربي ما شاء الله عليهم كل شي يبيعون ؟؟ سألت الصيدلاني عن الكريم اذا فيه كروتيزون أو لا قالي لا ما منه ضرر بس أنا ما حبيته يمكن استخدمته مره او مرتين لاني ما اثق في سوالف الخلطات ..

المهم مع استخدامي لمجموعة انجيلا لاحظت بأول الايام انه بشرتي صارت تتقشر منها الطبقة الميتة من الجلد .. وصارت جافه حيل وبعد فترة صارت ما تتقشر بس ظل الجفاف وما اقدر اقعد ولا ثانية بعد ما أغسل بشرتي بدون كريم مرطب الي أهوه من نفس مجموعة انجيلا .. وبعد لاحظت ان الكريمات لما احطها على بشرتي تحرقيني حيل وبعدين يخف العوار  .. وبعدين ابتدى مسلسل الرعب معاي .. شصار في ويهي  قام ينبط الجلد أو ينشق وينزل من ويهي دم ؟؟ فجأة جذي وبدون ما أحس فيه اصلا ولا أدري عنه اخترعت واخترعوا اهلي صاروا يقولون لي شفيج ليش ويهج ينزل منه دم جذيه ؟؟  ولما راجعت الدكتور اهوه بعد اخترع وفحص ويهي قال  صار في بشرتج  مرض الوردية الجلدي أو rosacea .. وغير لي النظام كله وعطاني علاج حق بشرتي + حبوب مضاد حيوي الي في الصور الي تحت علشان يعالج آثار الي صار معاي .. وكتب لي قائمة اشياء لازم ابتعد عنها والأشياء الي تأثر علي .. ولي الحين مو كل شي يناسب ويهي وبسرعة تتحسس بشرتي وبسبب الوردية تأذيت من وايد اشياء  حتى العطور والبخور اتحسس منها وحتى اذا كنت في مكان في ليتات نيون لازم ارجع واحط كمية من كريم علاج الوردية  واشياء سخيفة أو غريبة ما كنت افكر فيها من قبل لازم ابتعد عنها أو اتحشاها .. غريبة شلون نستخدم شي على البشرة أو الويه ويكون له انعكاس أو تأثير كبير لهاذي الدرجة



4 comments:

Anonymous said...

أولا: ما تشوفين شر و الله يكون بعونج.
ثانيا: أشكرج على الصراحةو الشجاعة في نقل تجربتج.

زرع الله في جسم الإنسان القدرة على تجديد الخلايا و القدرة الذاتية على التحسن مع مرور الوقت. فيوجد علاج لكل عرض أو مرض. و أنا شخصيا أفضل اللجوء للطرق الطبيعية و التي تعتمد أساسا على الغذاء السليم. فلم أكن أعلم ان ما نتناوله يؤثر بشكل كبير على صحتنا و مظهرنا الخارجي, إلا بعد مشاهدة هذا البرنامج الوثائقي

Food Matters (PART 1)

http://www.youtube.com/watch?v=RwZY1jaw2EM


And may I suggest this episode of Dr.Foz? This changed my entire eating habbits:

د كامل الفراج وحقائق تنشر لأول مرة 1 4‎

http://www.youtube.com/watch?v=gG-18HNInz0&feature=related


Oh and one more thing :P

Beauty Pressure

http://www.youtube.com/watch?v=Ei6JvK0W60I


* I enjoy reading your blog! O sorry 3al6wala

star said...

Anonymous

هلا فيج وحياج الله ويسعدني ردج وبالعكس لا طولتي ولا شي هذا مكانج

ومشكورة على دعوتج لي جزاك الله كل خير وأحب ابشرج فعلا مع الوقت والعلاج وايد تحسنت حالتي ولاحظت ان بشرتي بدأت تتجاوب مع اشياء بصورة أحسن من قبل

والغذاء الصحي صدقيني ما تتصورين شكثر أحاول أطبق هذا الشي والحمد الله في وايد امور قدرت أني اتجنبها وفي أشياء وايد مفيدة للصحة
قدرت اضيفها

مشكورة على البرامج الي حطيتيها ما شفتها لي الحين بس راح اشوفها وان شاء الله استفيد منها

Shaikah said...

حبيبتي ما تشوفين شر
انتي بشرتج حساسه نفسي
انا مستخدمه من كيلز ماسك اسمه
White brightening botanical hydrating mask
اول مره استخدمته شوي حرقني بعدين راح
مره ثانيه لما استخدمته ويهي شب احمر وحوالين الحلج طلعتلي نفس اكزيما باجر ان شاء الله موعدي الطبيب الله يسهل

star said...

hi shaikah

الشر ما أييج ،، ويي الله يعينج أن شاء الله يروح وترا الوايتنييغ أخطر شي حق الي بشرتهم حساسة واذا مضطرة تبين تفتحين مناطق غامجة لازم تحطين كريم فيه نسبة قليلة من الكرتزون علشان ما تتهيج البشرة لانه كريمات التبييض تسوي تهيج أو أنج تاخذيه مع اشراف طبيب

اختي استخدمت فوتو ايج من كيلز وتمدحه جربي اخذي سامبل منهم قبل لا تشترين لانهم يعطون سامبل حق اغلب منتجاتهم حرام تشترينه وما يناسبج

والماسك الي شريتيه رجعيه لهم لانهم تبع محلات الشايع وعندهم سياسة انهم يردون لج فلوسج او يبدلون لج